西甲　8/2(五)　華拉度列　對　維拉利爾

西甲周五晚率先帶來護級大戰，由華拉度列鬥維拉利爾。華拉度列上場作客包尾的侯爾斯卡，居然大敗0-4；至於上場易帥後首戰的維拉利爾，在賽前大幅回飛的情況下，主場一度領先2球大好形勢，居然在最後15分鐘，被愛斯賓奴迫和2-2。兩隊近況頹無可頹，今場平手盤相當難揀，可幸雙方近期都尚算叫做入得又失得，入球大仍有一搏之道！

排第14位的華拉度列，近7場聯賽只曾1勝，目前只領先護級區2分，要盡早逃離降班漩渦，今場面對尾二的維拉利爾，當然希望落井下石。不過，球隊已連續10場聯賽有失球，後防大將卡利路今場亦要停賽，加上球隊近7場聯賽，居然有6場是半場落後，經常打逆境波，喜歡敲冷的球迷，今場不妨小注維拉利爾半場贏波。

僅得19分排尾二的維拉利爾，現時已落後尾四的基羅納5分，球會領導層今季的決定亦屬笑話，季初以卡耶夏領軍成績欠佳，12月將其辭退，不過頂替的路爾斯加西亞，只上任50日又被炒，會方更重召卡耶夏回巢領軍。

經已9場不勝的維拉利爾，上場主場鬥愛斯賓奴，卡耶夏一改以往作風改踢三中堅，但出任清道夫位置的，竟是季內從未上陣兼已年屆37歲的邦利拿。結果這名意大利老將，開賽未夠10分鐘就先領黃牌，自此便不敢再主動搶截，下半場更在毫無壓力之下擺烏龍，完全是球隊的計時炸彈。

維拉利爾上場領先2球後，教頭卡耶夏居然將前場最具威脅的杜高伊甘比抽走，上述令人費解的舉動，就此令球隊埋下被追和的伏線。論實力、論搶分急切性，今場維拉利爾都是應該被看好的一隊，奈何球隊季內一再出現應贏變和、應和變輸的情況，反正雙方近期防線都極不穩陣，今場寧取入球大好過。

推介：入球大