歐冠　12/3(二)　曼城　對　史浩克04

歐聯16強另一場賽事，由曼城主場鬥史浩克04。上場2球落後、10人應戰兼作客，曼城都可反勝3-2，似乎兩者的實力差距，比起賽前想像中還要大。

今場回師主場出擊，就算奧達文迪與費蘭甸奴停賽，問題亦非太大，畢竟史浩克近況頹無可頹，防線亦千瘡百孔，球隊首回合大好形勢下最終落後，今場焗攻隨時招致大敗！

除了早前1-0小勝韋斯咸外，曼城近8次在主場出擊，居然有7次都能攻入對手3球或以上，如此瘋狂的主場威力，今場即使僅敗亦可出線，但以哥迪奧拿對球員的要求，相信球隊今場的目標，肯定不會如此低莊。首回合作客史浩克連輸2球12碼，相信哥迪奧拿對於曼城防守的接連犯錯，肯定甚為不滿。正當上場聯賽就連史達寧亦可大演帽子戲法，主場3-1輕取屈福特，今場遇上近況更差，戰績更曳的史浩克，狂數對手亦不足為奇。

近7場德甲只得2分的史浩克，目前已跌落聯賽榜尾五位置，季尾將要打護級戰。球隊內部問題相當嚴重，防守能力亦相當嚇人，連同歐聯首回合在內，史浩克經已4連敗，單是上述4場賽事已勁失14球，上周五作客雲達不來梅亦要輸2-4。以首回合曼城打少個兼作客，都能攻入史浩克3球，今場尚要出訪曼城的無敵主場，以球隊近期跌至谷底的士氣，慘敗而回實屬正常！

推介：曼城大勝