西甲　23/4(二)　艾拉維斯　對　巴塞隆拿

近5場不勝失10球的艾拉維斯，周二晚將在主場試圖挑戰一哥巴塞隆拿。曾一度殺上西甲前五的艾拉維斯，近仗亦明顯放軟手腳，已表明球隊無意競逐來季歐洲賽席位的立場，近2季主場鬥巴塞亦吞足8蛋，今場當然難望有任何驚喜。巴塞上場僅以2-1險勝皇蘇，一對箭頭蘇亞雷斯與美斯都無波入。二人季內在西甲已合共取得53個入球，連續2場無波入的情況絕無僅有，今場對手仍有一定戰鬥力，相信巴塞亦未必敢完全收油！

自從3月中作客3-1擊敗侯爾斯卡後，艾拉維斯近5場聯賽只得2分，當中兩鬥強隊馬體會與西維爾，更已先後以0-4及0-2見負，足證球隊並無足夠實力與列強周旋。畢竟艾拉維斯在冬季轉會窗，已將全隊創造能力最強，傳送眼界最好的伊巴爾高美斯賣至畢爾包，擁有一定突破能力的前皇馬青訓貝基，亦因十字韌帶撕裂長唞，下半季從貝迪斯借用的日本國腳乾貴士，亦因要遷就陣中左翼莊尼，而要轉打不擅長的右翼，對於艾拉維斯的整體戰鬥力，當然是遠不及上半季。

巴塞能否贏波甚至能否大勝，某程度上亦要看看一眾天王巨星的戰意，但經過上場鬥皇蘇的慢調斯理後，相信今場蘇亞雷斯與美斯再無波入的機會，已是微乎其微。畢竟巴塞近2季在聯賽4鬥艾拉維斯，單是上述兩人已轟入9球，上季作客2-0贏艾拉維斯時，美斯梅開二度之餘；前季巴塞作客6-0贏波，美斯又有入波的同時，蘇亞雷斯亦射入2球。

由於馬體會上周同樣贏波，巴塞要提早奪冠，數字上仍要多取6分。下周歐聯4強便殺到，巴塞為求無後顧之憂，今場看來是時候免除後患。

另文中下方，有筆者的微信二維碼，若朋友們希望一齊吹水傾波經，不妨掃一掃加我，我拉大家入吹水群。

推介：巴塞隆拿