拜仁火力全開 作客照炒賓菲加

歐聯分組賽，賓菲加迎戰拜仁慕尼黑。賓菲加首戰作客0-0賽和基輔，上輪則主場3球大炒巴塞，出線形勢大好，不過球隊近期演出接連失準，聯賽及盃賽已2場不勝。拜仁開季2場歐聯轟入8球，上輪德甲作客利華古遜，半場已贏5球，火力全開。今輪勇況持續下，即使作客仍有力輕取對手！

賓菲加今屆在歐聯附加賽，與燕豪芬火拼兩回合才險勝過關，實力不宜高估。首輪分組賽作客亦賽和基輔，痛失搶3分良機，上輪遇上當時正值頹勢的巴塞，結果主場3球大炒對手。不過，自大炒巴塞後，賓菲加在本土賽事的演出接連失準，繼聯賽主場爆大冷0-1不敵弱旅樸迪莫倫斯後，上輪在葡萄牙盃鬥低組別球隊泰羅芬斯，居然只能踢成1-1。今輪硬撼拜仁，當然毫無搶分把握。

拜仁早前亦曾爆大冷主場不敵法蘭克福，但上輪作客利華古遜的德甲榜首大戰，拜仁居然半場已贏5球，最終埋單贏5-1，盡展霸氣。球隊今屆已在頭兩輪歐聯分組賽，3球大炒巴塞後，再以5球狂數基輔，今輪就算有哥利斯卡養病、阿方素戴維斯養傷，但以利雲度夫斯基、基拿比、湯馬士梅拿近期的腳風，要在作客情況下擊退賓菲加，似乎亦非甚麼不可能的任務！