3連敗0入球 賓福特迎維拉吼「細」

周日英超，賓福特迎戰阿士東維拉。賓福特近2場英超連同聯賽盃8強，3戰全敗0入球，幸好球隊防守能力尚算不俗，今輪主場出擊下，預期失球不會多。維拉近況梅花間竹，3場輸波只是不敵英超3頭馬車曼城、利物浦與車路士，球隊鬥中下游份子有一定優勢，防守亦尚算對辦，今輪鬥賓福特坐和望贏，首選取入球「細」！

賓福特近期接連鬥車路士、白禮頓與曼城都輸波，但3場都開入球細，失球1球起2球止。上輪鬥曼城踢得更被對手好，最終1球僅敗，純粹是前線把握力的分野，論狀態、士氣、鬥心都好，唯一缺點只是前線球員的質素。上屆英冠神射手東尼，今季升上英超後僅入2球，實力見盡；隊內其餘前鋒安保姆、韋沙、科斯，季內產量都不高，今場就算得主場之利，預期入球亦不會多。

維拉近期應贏則贏，3場輸波只是不敵英超3頭馬車。不過，今場隊長明斯需要停賽，而射手丹尼京斯今季從修咸頓加盟後，入球產量卻大不如前；另一射手奧利屈堅斯礙於質素，季內產量亦不高。至於新季從諾域治加盟，本想取代加利殊領軍位置的布安迪亞，今季在維拉的演出亦遠不及上屆在英冠的光芒四射。今輪出訪踢法硬淨，中前場搶截力極強的賓福特，預期維拉一眾進攻球員，未必能夠輕鬆組織攻勢。一場介乎維拉贏與和之間的比賽，吼入球細會較為穩陣！