訪愛華頓豆腐防線 C朗復出曼聯「大」得起

周六英超早場，愛華頓迎戰曼聯。愛華頓周中補賽作客2-3不敵般尼後，護級形勢已水深火熱，鬥般尼亦要失3球，防線弱不禁風，今輪就算回師主場出戰，預期防線仍會立立亂。曼聯近期作客入得失得，近5場英超作客就有其中4場的總入球是4球或以上。目前曼聯仍要為爭奪來屆歐聯入場券而努力，基本上是1分都不能少，適逢愛華頓同樣要搶分護級，預期雙方都會由頭搏到尾，入球大捧得過！

愛華頓周中作客般尼，雖憑列查利臣射入2球12碼，半場前反超前2-1，但防線接連的低級犯錯，終被般尼後上贏3-2。6分波3分全失後，愛華頓目前只領先尾三的般尼1分，季尾更是硬仗連場，稍一不頓隨時降班。縱然有極大搶分必要，奈何愛華頓近績卻是差到不得了，近7場英超1勝6負，只曾主場1球險勝紐卡素。除了雲迪比因借用條例關係未能落場外，安祖斯唐辛、安達高美斯、耶利美拿、湯戴維斯等都要養傷，以林柏特接掌後防線毫無改善的差劣表現，今輪硬撼曼聯，隨時又出現大量失球。

上周1-1賽和李斯特城的曼聯，目前已跌落第7位，但其實只落後4、5位的熱刺與阿仙奴3分，依然有力問鼎來季的歐聯入場券。球隊近期絕大部份作客賽事都是入球騷，鬥曼城輸1-4、鬥列斯聯贏4-2、鬥賓福特贏3-1、鬥維拉亦和2-2，基本上絕無悶場。上周因病缺陣的C朗，今場可以復出，這名葡萄牙老將，前一周就憑一己之力，在熱刺身上獨取3球，成為贏波英雄。今輪出訪防線長期積弱的愛華頓，看來已是搶3分的黃金機會，但曼聯防線亦經常不穩，入球大更加穩陣！