禾夫斯堡5戰失16球 迎緬恩斯鬥「大」膽

周五德甲，禾夫斯堡迎戰緬恩斯。禾夫斯堡上周作客1-6慘敗予多蒙特腳下，半場已輸5球，防線相當嚇人。幸好，球隊在前一周主場才以4球大炒比勒費爾德，主場出擊仍有一定入球能力。緬恩斯作客經已10場不勝，但其中9場都有波入，作客演出雖遠不及主場，但勝在肯攻肯拚。雙方近4次交手，其中3次都開「大」，今季首循環緬恩斯主場贏3-0，上季緬恩斯作客禾夫斯堡則贏3-2。是役德甲中游對碰，首選吼入球「大」！

禾夫斯堡目前得34分排13，領先尾3的史特加6分，仍有些微護級壓力。球隊近5場德甲1勝4負，除了主場4球大炒比勒費爾德外，基本上無場好睇，4場敗仗每場至少失2球，戰績相當嚇人。射手華特舒密特、中堅拿確斯仍在養傷，長人中鋒韋賀斯季中已被賣至般尼，戰鬥力少不免進一步受挫。幸好，隊內幾名新星尼美卡、巴古、盧基巴基奧等都有一定潛力與入球能力，預期今輪主場出擊，就算防守表現未見改善，但要攻破緬恩斯的脆弱防線，亦非難事。

緬恩斯今季只打主場，早前才在主場取得5連勝，但作客不經不覺已是10場不勝。月初才與科隆駁火，緬恩斯2球領先大好形勢下，終被主場之利的科隆連追3球反勝3-2，防守能力仍有大幅進步空間。幸好，緬恩斯已手執39分排第9，既無護級壓力，又無力爭取來屆歐戰入場券，今場風流波大可繼續沿用球隊的主攻踢法，面對同樣脆弱的禾夫斯堡防線，說不定隨時有望在客場反底。畢竟，雙方近2次交手，緬恩斯全勝之餘，2次都能攻入3球，今場入球「大」相當穩陣！