亞冠　6/3(三)　全北汽車　對　北京國安

亞冠盃G組大戰，由全北汽車鬥北京國安。全北汽車是上屆韓職冠軍，亞冠亦殺入8強，僅以互射12碼不敵水原藍翼而無緣4強，上屆分組賽首名出線之餘，主場3戰更是全勝，今仗主場出擊，當有一定優勢。

北京國安是上屆中國足總盃冠軍，對上1次出戰亞冠，經已是2015年，當年16強正正被全北汽車淘汰。以全北近年在韓職及亞冠的主場氣勢，相信國安作客要搶分，應有一定難度！

上屆在韓職以大超班姿態取得聯賽冠軍的全北，雖然在亞冠8強止步，但在分組賽卻以近乎無敵的姿態出線，6戰5勝1負攻入22球，當中3場主場更是全勝，先後以3-2反勝柏雷素爾、6-3大炒天津權健、3-0輕取傑志。

縱然球隊剛在韓職開鑼戰，主場僅以1-1賽和大邱，但以上屆聯賽射入22球的巴西前鋒尼加奧、同鄉列卡度盧比斯的合拍程度，再配合幾名高質土炮金信煜、李鎔，以及寶刀未老的李同國，今屆以近乎原班人馬再戰，依然是一路奇兵。

上屆中國足總盃冠軍國安，中超只排第4，不過陣中就有多名歐戰經驗豐富的猛將在陣，前利華古遜巴西國腳奧古斯度、前維拉利爾射手巴甘保、前拉斯彭馬斯傳奇級球星維亞拉，都是極具級數的球員。今屆，球隊更引入2名在歐洲出世的歸化兵，分別是在挪威出世，曾效力洛辛堡、史達比克的侯永永，以及在英格蘭出世，前阿仙奴青訓產品李可。

不過，中國新星韋世豪今屆被恆大挖角、近兩屆入球泉源西班牙前鋒莊拿芬蘇利安奴轉戰中東掘金，對於國安今屆的攻力，確實有一定影響。球隊在中超開鑼日，面對實力不強的武漢卓爾，亦僅勝1-0，早前在中國超級盃亦以0-2不敵上海上港。事隔4年再度出戰亞冠盃，要出訪主場威力無窮的全北，未必能全身而退！

另文中下方，有筆者的微信二維碼，若朋友們希望一齊吹水傾波經，不妨掃一掃加我，我拉大家入吹水群。

推介：全北汽車