歐霸　11/4(四)　阿仙奴　對　拿坡里

歐霸盃8強焦點大戰，阿仙奴將在主場迎戰拿玻里。阿仙奴上場聯賽作客愛華頓，踢來雖然乏善足陳，不過今屆球隊主客場表現分野實在太大，往往幾日前作客踢到一條蟲，幾日後返主場已可即時變身，以阿仙奴在英超主場10連勝的強大氣勢，面對作客演出例打折扣的拿玻里，有望在首回合率先取得甜頭！

上場作客愛華頓，阿仙奴實在輸得肉酸，縱然戰果只是0-1，但心水清的球迷都會知道，該仗阿仙奴落後下，只有再失波而毫無扳平機會。不過，早前作客巴迪、作客雷恩，阿仙奴何嘗不是表現差到不似真？既然球隊今屆只能靠主場搵食，今次8強抽籤後，要遷就同市宿敵車路士的關係，要改為「先主後客」，今場面對強手拿玻里，就算阿仙奴心繫英超前四席位，似乎仍有必要在主場盡力數糊。

季內一直受到不少傷停問題困擾的阿仙奴，難得在歐霸戰場並無球員停賽，相信艾馬利必定趁今晚坐擁主場之利，人腳又較過往齊全下，力圖取得一定的領先優勢。畢竟，以阿仙奴今屆作客的表現，次回合出訪拿玻里是毫無把握。今場難得在英超停賽的烏拉圭中場杜利拉，能夠在歐霸戰場復出，就算夏卡與高斯尼仍有傷在身，只要球隊能夠發揮出過往的強大主場威力，依然有可勝之道。

由歐聯降班打歐霸的拿玻里，今屆歐聯分組賽3場作客只得2分，上圈歐霸作客亦以1-3不敵薩爾斯堡，明顯不擅作客，幸好一對中堅迪亞華拉與馬森莫域今場雙雙停賽刑滿復出，形勢上，看來又未算太壞。不過，前一仗意甲作客安玻里，拿玻里在未有收起太多主力下，依然以1-2落敗；上場意甲主場鬥熱拿亞，拿玻里人腳上更齊整，剛傷癒的恩薛尼亦已後備落場，但最終面對大半場10人應戰的熱拿亞，亦只能踢成1-1。拿玻里的近態，確實令人擔心。

早前頭部受傷的奧斯賓拿，今場可望復出倒戈阿仙奴，但以拿玻里今屆歐戰5場作客僅取1勝2和2負的劣績，遇上歐戰主場5戰4勝1和不敗，近4場零失球的阿仙奴，當然比被下去。連同各項賽事主場7連勝的阿仙奴，對上6場主場，均可淨勝對手2球或以上，今場遇上近期表現同樣反覆的拿玻里，有力再憑主場氣勢再下一城！

另文中下方，有筆者的微信二維碼，若朋友們希望一齊吹水傾波經，不妨掃一掃加我，我拉大家入吹水群。

推介：阿仙奴