英超　26/12(三)　曼聯　對　哈德斯菲爾德

踢走摩連奴後全隊精神爽利的曼聯，上場作客5-1大炒卡迪夫城後，今場蘇斯克查更是上任後首度重返奧脫福，欣逢另一支弱旅哈特斯菲爾德。曼聯目前士氣好到加零一，難得再遇弱旅，相信全隊肯定趁這段蜜月期，齊心搏命繼續搶3分，就算今場讓到球半兩球，曼聯上算仍然值捧！

曼聯

以曼聯現時的班底，只要球員肯齊心搏命，相信絕不會落後榜首的利物浦19分之多。就算今季無緣爭標，仍想力爭前四的話，餘下賽季仍要非常努力，事關目前已落後第4位的車路士8分。不過，自從摩連奴一炒，全隊隨即笑到見牙唔見眼，笑得最大聲的普巴，上場隨即交出3次助攻，而開心到跳舞的連加特，上場亦梅開二度兼交出1次助攻。連同馬斯亞與華舒福上場亦有進帳，相信今場作為蘇斯克查重返奧脫福的首戰，一眾紅魔肯定傾盡全力，務求大勝一場賀新帥回歸。

哈德斯菲爾德

哈特斯菲爾德上季能夠護級成功已屬奇蹟，今季不進反退下，成績進一步下滑是相當合理。目前，哈特斯菲爾德僅以較佳得失球差，力壓富咸毋須排包尾，球隊季內亦只曾贏過富咸及狼隊2支升班馬。球隊在英超已5連敗，隊中靈魂澳洲國腳穆爾，更因膝傷要唞3個月。近期球隊在主場3度遇上同級球隊白禮頓、紐卡素及修咸頓，居然3戰全敗，今場尚要作客硬撼易帥後脫胎換骨的曼聯，再輸一場似乎是無可避免。

分析

哈特斯菲爾德未來幾場聖誕及新年賽程，將連接面對幾支同級球隊富咸、般尼及卡迪夫城，相信球隊的目標，肯定是未來3場英超，今場對曼聯肯定並非搏殺場次。反而曼聯在1月中鬥熱刺前，對手只是般尼茅夫及紐卡素，以球隊上場對卡迪夫城的勇猛表現看，今場遇上難兄難弟哈特斯菲爾德，理應絕無手軟！

推介：曼聯 上盤