歐國聯意西大戰等睇加時

歐洲國家聯賽4強大戰，意大利與西班牙將在周三晚合演歐國盃4強翻版戲碼。意大利是次有恩莫比利、比洛迪等正中鋒因傷落選，替補人選只有堅恩與拉斯柏度利，鋒力未算太強；西班牙今次更選了大批新秀，常規射手摩拉達、謝拉特摩蘭奴都因傷缺陣。兩隊前線今場都有疑點，和波、入球細值得秤先！

勇奪歐國盃後，意大利在9月份的3場世界盃外圍賽，其中2場的演出都為人垢病。除了主場大勝弱無可弱的立陶宛5-0外，主場鬥保加利亞、作客瑞士最終都只能和波收場。其實撇除大勝立陶宛，意大利由今夏歐國盃16強鬥奧地利開始，法定時間就只曾擊退過殘陣出擊的比利時，其餘歐國盃4強鬥西班牙、決賽鬥英格蘭，與上述提到鬥保加利亞、瑞士的世界盃外圍賽，近7場賽事就有5場打和。

西班牙的情況表面上較好，對上2場世界盃外圍賽，曾4球大破格魯吉亞，又能作客2球淨勝科索沃，但上述對手根本未達級數。其實西班牙在今夏歐國盃淘汰賽，由16強鬥克羅地亞、8強鬥瑞士，以及4強鬥意大利，全數都是鬥到加時甚至互射12碼才能分勝負。連帶9月份首場世界盃外圍賽，作客1-2不敵瑞典，,西班牙近期鬥同級對手，根本就未贏過。

論人腳，意大利今次尚算完整，今場尚有主場之利，成熱亦十分合理。不過西班牙是次挑選大量新血，反而會更加搏命，球隊縱然未有明顯長處，但以意大利的疲弱攻力，要將西班牙擊退亦有難度。兩隊和波王碰頭，看來又要等睇加時！