巴塞變陣成功 主場誓炒基輔

歐聯分組賽，巴塞隆拿迎戰基輔戴拿模。朗奴高文近期終於跪低，巴塞踢回4-3-3陣式，將右閘達斯治推前打右翼，配合迪比及安素法迪攻堅，效果不俗，上輪西甲就在主場3-1擊敗華倫西亞，今場續留守主場出擊，迎戰上輪慘吞拜仁5蛋的基輔，有力打開今屆歐聯的勝利之門！

巴塞頭2輪歐聯分組賽，面對拜仁及賓菲加都慘吞3蛋，演出差劣無比，出線形勢亦亮起紅燈。幸好，經過隊內外猛烈批評後，領隊朗奴高文終於將巴塞踢回4-3-3陣式，起用年僅17歲的新晉西班牙國腳加維領軍，配合巴斯基斯、法基迪莊組成3人中場線。

新10號波衫主人翁安素法迪，近期成功克服半月板傷患復出後，接連取得入球，巴塞前線亦隨之活躍。現時球隊前中後3線，亦終於達至攻守平衡，今輪續留守主場出擊，預期今場可望向基輔施展猛烈攻勢。贏波3分志在必得之餘，說不定有望大炒對手。

基輔首戰主場0-0悶和賓菲加，上輪作客拜仁則以5球見負，2戰仍是0入球，已反映球隊前線鋒力是如何不濟。今輪出訪巴塞，射手比薛甸仍因傷缺陣，大大削弱前線威力。適逢巴塞近期及時上力，相信以基輔的實力，是次來到魯營球場，要力保不失實在談何容易！