主場越贏越易 利物浦可輕取修咸頓

周六英超，利物浦迎戰修咸頓。利物浦周中歐聯收起半隊主力，依然輕鬆2球淨勝波圖。球隊上周才在福地4球大炒阿仙奴，今輪遇上上輪不敵諾域治的修咸頓，以沙拿、文尼近期的勇態，隨時又輕勝。修咸頓近4季作客晏菲路，4戰全敗0入球失12球，今場想死守搏1分亦不易！

利物浦周中歐聯，收起了雲迪克、阿歷山大阿諾、迪奧高祖達等主力，早前養傷的羅拔臣、佐敦軒達臣、法賓奴等，亦只是後備登場，結果半力出擊依然以2球淨勝波圖，分組賽5戰全勝。球隊今季的進攻泉源當然是右路，事關沙拿與阿歷山大阿諾，季內合共炮製出13次助攻，適逢修咸頓今季一直起用右閘獲加比達斯串演左閘，效果相當一般，看來沙拿與阿諾今場又有機會出現「放題時間」。

修咸頓今季作客曾悶和曼城，但曾贏過屈福特，不過上輪作客不敵諾域治，似乎已反映球隊的近態開始出現問題。今季賣走丹尼京斯，前線阿當斯、阿當岩士唐的產量明顯無法替補；中堅賣走維斯達加特，防守死球明顯不及過往穩陣；左閘貝查特自由身離隊而未有任何替補，改用右閘獲加比達斯串演左路，防守企位有待改善的同時，左路進攻更猶如自斷半臂。今場面對主力悉數復出的利物浦，修咸頓出訪晏菲路，確要自求多福！