歐聯主場全勝0失球 信車路士反底贏皇馬

歐聯8強首回合，車路士迎戰皇家馬德里。車路士上輪英超爆大冷主場1-4慘負賓福特，表現差到不似真，但今屆歐聯主場4戰全勝0失球，上屆歐聯4強鬥皇馬，主場亦贏2-0，戰績極之硬淨。皇馬上輪西甲搏得3球12碼，最終賓斯馬射入2球，險勝切爾達2-1，總算在國家打吡慘吞巴塞4蛋後，及時止跌。但球隊上輪歐聯之所以能夠反勝巴黎聖日耳門晉級，多多少少只怪巴黎防線接連犯上嚴重低級錯誤所致，今輪遇上向來防守能力極強的車路士，皇馬未必再有優勢！

車路士上輪英超離奇大敗，演出相當嚇人，但球隊主場演出向來穩定，今屆歐聯主場4戰全勝0失球，鬥祖雲達斯、馬模贏4球，鬥里爾贏2球，鬥辛尼特贏1球，上屆歐聯4強主場鬥皇馬亦贏2球，戰績相當硬淨，預期今輪回歸歐聯戰場，球隊表現會折然不同。始終，杜曹過往6次帶隊鬥皇馬都未輸過，上屆4強就曾淘汰對手殺入決賽，最終更成功捧盃。既然球隊前途未卜，難得歐聯仍有機會衛冕，相信一眾車路士球員仍會奮力作戰，務求留下美好回憶。

皇馬在歐聯16強鬥巴黎，基本上是完全捱打，最終能夠死裡逃生，除了今場倒戈的門神古圖奧斯兩回合合共作出13次撲救，包括救出首回合美斯主射的12碼之外，更重要的只是一眾巴黎星級戰將，在次回合半場總比數領先2-0時，以為皇馬已無力回天，從而放軟手腳，最終驕兵必敗。眼看兩鬥巴黎都是捱打，西甲國家打吡更恥辱性大敗，今輪賓斯馬雖能傷癒復出，但上輪西甲之所以能夠及時止跌，都只是運氣使然。遇上防守向來穩陣的車路士，要再像上輪鬥切爾達一場搏得3球12碼，機會實在是微乎其微！